PHILEMON Di lede a Paul ang gi Philemon

Di haga modongoohia

Philemon tangada aamua i di nohongo dabu i Colossae, dana hege go Onesimus. Di hege deenei ne lele gi daha mo mee, gei nomuli ga heetugi gi Paul i di madagoaa Paul nogo noho i lodo di hale galabudi. Paul ne hidi mai ai Onesimus ga hai di tama Christ.

Di lede a Paul ang gi Philemon, Paul e hagamahi gi Philemon gi manawa lamalia mo di dumaalia ang gi Onesimus, dela ne hagau go Paul gi mee, ga hai bolo mee gi benebene ina a mee, hagalee bolo mee dela di hege e kae di wwede ono hala, gei i mee dela tuaahina dama Christ.

Di hagahonu di beebaa deenei:Di haga modongoohia (1-3)Paul e hagaamu a Philemon (4-7)Tangidangi hagamahi i Onesimus (8-22)Di hagaodi o di lede (23-25)

Philemon

1 Mai baahi o Paul, tangada galabudi i di gili o Jesus Christ, mo mai tadau duaahina go Timothy, ang gi di mau ihoo hagaaloho, ihoo hai hegau go Philemon, 2 mo ang gi di nohongo dabu dela e dagadagabuli i lodo doo hale, mo tadau duaahina ahina go Apphia, mo anga labelaa gi tadau ihoo dauwa go Archippus. ^a

3 God tadau Damana mo tadau Dagi go Jesus Christ, gi dugua adu gi goodou tumaalia mo di aumaalia.

Di aloho Philemon mo dono modudahi

4 Dogu duaahina go Philemon, nia madagoaa huogodoo e dalodalo iei au gei au e haga langahia goe, gei au e danggee ang gi God, 5 idimaa, au gu longono eau doo aloho i nia daangada a God huogodoo, mo doo hagadonu tadau Dagi Jesus. 6 Au e hai dalodalo i tadau hagadaubuni i di hagadonu, ga hidi mai ai gidaadou ga modongoohia nia hagahumalia huogodoo, ala gu hai mee ginai gidaadou i tadau mouli buni ang gi Christ. 7 Dogu ihoo hagaaloho, doo aloho gu hidi mai iei au gu tentene huoloo, gei gu hagamaaloo aga ogu lodo. Goe gu haga tentene nia manawa o nia dama a God huogodoo.

Tangidangi i di gili o Onesimus

8 Idimaa goe tuaahina ni oogu mai Christ, gei au ga mee di hai adu gi di goe bolo goe gi heia di mee dela e humalia dono hai kooe. 9 Gei di maa au e aloho i di goe, gei au ga dangidangi adu gi di goe. Au e hai di mee deenei, maeaha maa au go Paul, au e pono a Jesus Christ, gei dolomeenei au e galabudi i di gili o Christ. 10 Au e pono Onesimus, e hai tangidangi deenei adu gi di goe. Mee gu hai tama daane donu ni aagu mai i Christ, idimaa, au gu hai tamana ni mee i lodo di hale galabudi. ^b 11 Di madagoaa i mua, gei mee nogo deai dono hadinga adu gi di goe ai, gei dolomeenei gu dahidamee ngaadahi mai gi gidaua. 12 Au e hagau adu Onesimus gi muli, gei dogu manawa e hanadu madalia a mee. 13 Au e hiihai bolo mee belee noho dalia au i ginei i dogu madagoaa e galabudi iei au i di gili di Longo Humalia, e pono doo lohongo, e hagamaamaa au. 14 Au hagalee hono adu gi di goe bolo gi hagamaamaa ina au. Au e hiihai bolo goe gi heia aga hua i lodo doo manawa. Au hagalee hai di mee dela hagalee donu ginai goe.

15 Onesimus ne mogowaa i di goe i tama madagoaa bodobodo, gei goe belee gahi adu a mee gi doo baahi labelaa . 16 Dolomeenei gei mee hagalee di hege, mee gu hai tuaahina hagaaloho dama a Christ. Mee gu dahidamee huoloo mai gi di au, gei mee ga dahidamee adu gi di goe huoloo, i mee hagalee di hege hua, gei mee tuaahina ni oou i di gulu buni ang gi Tagi. 17 Maa goe e hagamaanadu bolo au di hoo ni oou, gei goe gi benebene ina a mee, gadoo be goe ma ga benebene au. 18 Maa mee gu hai dana hala adu gi di goe, be e boibana dana mee adu gi di goe, gei goe haga ingoo ina mai gi di au. 19 Au e hihi nia mee aanei gi dogu lima donu: au go Paul ga hui adu laa gi di goe. (Au hagalee belee haga langahia adu oo boibana mai gi di au i doo mouli.) 20 Deenei laa, dogu duaahina nei, dumaalia haga gila ina di mee deenei i di ingoo o Tagi. Goe haga tentene ina dogu manawa be di hoo ni oogu i di ingoo o Christ. 21 Au e iloo i dagu hihi adu nia mee aanei, bolo goe ga haga gila dagu dangidangi deenei, gei e donu, au e iloo bolo goe ga hai labelaa gi nonua. 22 I di madagoaa la hua, gei goe gi hagatogomaalia ina dagu gowaa e noho ai, idimaa, au e hagadagadagagee bolo God ga hui adu laa godou hai dalodalo, ga lahadu au gi goodou.

Nia hagaaloho hagaodi

23 Epaphras dela e galabudi madalia au i di gili o Jesus Christ, e hagau adu dana hagaaloho, ^c 24 mo ogu ihoo hai hegau aanei, go Mark, Aristarchus, Demas mo Lk e hagadae adu di nadau hagaaloho. ^d

25 Tumaalia o tadau Dagi go Jesus Christ gi madalia goodou.

PHILEMON Di lede a Paul ang gi Philemon

Di haga modongoohia